منتدى الحوار المطلق ..... منتدى الرأي و الرأي الاخر
مرحبا بكم , حللتم أهلا و نزلتم سهلا تحت غطاء الحوار المطلق
منتدى الحوار المطلق ..... منتدى الرأي و الرأي الاخر

أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى

منتدى الحوار المطلق ..... منتدى الرأي و الرأي الاخر  » منتدى الشعر و الخواطر » منقول الأشعار » رباعيات

رباعيات

استعرض الموضوع السابق استعرض الموضوع التالي اذهب الى الأسفل  رسالة [صفحة 1 من اصل 1]

1 رباعيات في السبت 28 مارس 2009, 03:18

اللسان الحر


عضو نثق به (ا)
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!


أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!


يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!


يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!


ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي !!!


علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. و حتي علي رأسي دم
أنا كلي دم .. قتلت ؟ ..... والا اتقتلت
عجبي !!


ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
عجبي !!!!


شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي !!!


أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي !!


إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي !!!


في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
عجبي !!!


- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
عجبي !!!!


سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب و المواويل
عجبي !!


يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك
عجبي !!!


ياللي نصحت الناس بشــــــــــــــرب النبيت
مع بنت حلوه .. وعود , وضحك , وحديت
مش كنت تنصحهم منين يكســــــــــــــــبوا
تمن ده كله ؟ ... و الا يمكن نســـــــــــيت
عجبي !!


كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب
عجبي !!!!


تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
و انا ليه بيمضـــــــــــي ربيع وييجي ربيع
و لسه برضك قلــــــــــــــــــبي حتة خشب
عجبي !!!


بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!


أنا إله الوجد رب الهيــــــــــــــــام
أضرب بسهم الوهم وهم الغـــــرام
و هم الغرام من كتر ما هو لذيـــــذ
رشقت انا ف صدري جميع السهام
عجبي !!!


حدوته عن جعران و عن خنفســــــــــه
اتقابلوا حوا بعض ساعة مســـــــــــــــا
و لا قال لهم حد اختشوا عيب حـــــرام
و لا حد قال دي علاقة متدنســــــــــــــة
عجبي !!!!


ياللي عرفت الحب يوم و انطــــــــــــوي
حسك تقول مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره...ارتوي
عجبي !!!


زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة
عجبي!!


يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي !!


فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح
عجبي !!!!


انا الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق
عجبي !!!


العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزله انا.. و انشا لله يهبرني فــــــــخ
عجبي !!!


غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي !!!


حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!


يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي !!


اوقات أفوق و يحل عني غبــــــــــايا
واشعر كأني فهمت كل الخبايـــــــــــا
و افتح شفايفي علشــــــان اقول الدرر
ما أقولش غير حبة غزل في الصبايــــا
عجبي !!!


عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي !!


حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيــــت
إن الطبيعة كمان لا أخلاقيــــــــــة
عجبي !!!!


أنا قلبي كورة و الفراودة أكــــــــــم
ياما اتنطح و انشاط و ياما اتعكـــــم
و اقول له كله ح ينتهي في المعـــاد
يقول بساعتك ؟ و الا بساعة الحكم ؟
عجبي !!!


أهوي الهوي و همس الهوي في العيون
وبسمة المغرم ودمعه الحنـــــــــــــــون
و زلزلات الحب نهد الصبـــــــــــــــــــــا
أكون انا المحبوب أو لا أكــــــــــــــــون
عجبي !!!


الدنيا صندوق دنيا .. دور بعــــد دور
الدكة هي .. و هي كل الديكـــــــــور
يمشي اللي شاف ويسيب لغيره مكان
كان عربجي أو كان امبراطــــــــور
عجبي !


علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا تجلب المال و لا تصون العرض

http://7iwarmotla9.ahlamontada.net

2 رد: رباعيات في الإثنين 30 مارس 2009, 01:49

المتمرسة

avatar
عضو نثق به (ا)

بسم الله الرحمن الرحيم

السلام عليكم و رحمة الله تعالى وبركاته




تحفة بدوية جميلة جدا

استمتعنا كثيرا بقرائتها رغم طولها و ما زادها هدا الطول الا شقاوة

الأمر الدي أحزنني عند الوصول الى نقطة النهاية هي أني لم أجد التوقيع

و لم أتمكن من معرفة كاتب هده الملحمة البدوية الجميلة ،

معرفة صاحب القلم امر مهم جدا و هذا امر أسأل عنه دائما في الابداعات الشعرية


ان كنت يا صاحب اللسان الحر كاتبها فهنيئا لك هدا المستوى الرفيع من الابداع و ننتظر منك المزيد ، فلا تبخل علينا

و ان لم تكن كاتبها فشكرا لك على نقلها الينا و هنيئا لنا بالاستمتاع بها

مرة أخرى شكرا لك

تقبل تحياتي



_________________

استعرض الموضوع السابق استعرض الموضوع التالي الرجوع الى أعلى الصفحة  رسالة [صفحة 1 من اصل 1]

صلاحيات هذا المنتدى:
لاتستطيع الرد على المواضيع في هذا المنتدى