الرئيسية
السلام عليكم ورحمة الله وبركاااااته
عسى عيدكم مبارك
شهيوات عيد الأضحى المبارك
الشواء
المقادير:
قطع لحم هبرة
قسبر ومعدنوس مقطعين
بصلة مشضة
ملح
شوية قسبر يابس
يبزار
زيت
سكنجبير
تحميرة
الطريقة:
نمزج اللحم مع التوابل ونخليوه شوية حتى يشربها...
نعملو القطع فقطبان ونشويوهم فمجمر
وصفة الخليع
للأمانة فالوصفة منقولة من عند اخت إسمها farah_ch1
جزاها الله كل خير.
المقادير:
قطع لحم مقطعة طويلة ومتبلة بالعطرية اللي هي:
( الثوم مدقوق- قسبر يابس -ملح- الخل- زعفران)...
*قياس العطرية على حسب كمية اللحم وعينك ميزانك *.
شحمة الكلية نطحنوها ونعملو معاها الكمون والقسبر
قياس الماء الكافي لنضج اللحم
زيت المائدة تساوي*نفس كمية الشحمة*
الطريقة:
هادي صورة قطع اللحم بعدما كنخلطوه مع العطرية ونخليوه مرقد شوية حتى يشربا
من بعد... نعلقوه فالهواء الطلق حتى ييبس تماما... وهدا شكله وهو يابس
نجيبو هاد اللحم المقدد نقطعوه طريفات صغار
ونزيدو لو الشحمة مطحونة مخلطة مع الكمون والقسبر يابس
فكوكوط كنعملو القياس اللي يكفينا من الماء باش يطيب اللحم... ونخليوه حتى يسخن
ملي يسخن الماء نزيدو عليه الشحمة ونخليوها حتى تدوب عاد نضيفو قطع اللحم والزيت
نشدو على الكوكوط حتى يطيب اللحم
وملي نفتحو عليه ننشفوه تماما من الماء بحيت بيقى اللحم واقف غير فالشحمة والزيت
ملي يبرد نعملوه فقنينات زجاجية او فعلب بلاستيكية
وهذا شكله النهائي
بصحتكم وراحتكم...
بولفاف
المكونات والمقادير:
قطع الكبدة والقلب
يبزار
كمون
ملح
بصلة مقطعة
قسبر ومعدنوس
تحميرة
شحمة الدوارة مقطعة لمربعات
نتبل قطع الكبدة والقلب بالعطرية ..نلف كل قطعة في مربع من الشحمة
ثم ندخله في الأسياخ أي القطبان وتشوى فالمجمر.
التقلية بالكبدة
المقادير:
الكبدة ناخدوها كيف ماهي ونشويوها فالمجمر *نصف طيبة*
ثم نقطعها قطعا صغيرة.
كاس من الزيت
القسبر والثوم مدقوقين مع الملح فالمهراز
ملعقة صغيرة كمون
التحميرة
كاس *عنبة* من الماء
عصير الليمون الحامض
الطريقة:
نعملو كل هاد المكونات مع بعضها ونخليوها تطيب على عافية منقوصة
وقبل التقديم نضيف لها عصير الحامض اللي كيضيف للكبدة مذاق جد لذيذ.
اللحم الغنمي محمر بالسمن وعلى المجمر
المقادير:
اللحم الغنمي
الثوم مدقوق
زعفران حر
زعفران عادي
تحميرة
كمون
السمن
الملح
زيت المائدة
الماء الكافي لنضج اللحم
الطريقة:
نشرملو اللحم بالسمن والعطرية ونعملوه فطنجير كبير على المجمر
ونخليوه يطيب حتى يوقف فالزيت.
وعند التقديم نزينه بالكمون.
نصيحة:
فحالة ما إذا كان اللحم قاسح وما بغاشي يطيب
عندي طريقتان باش يطيب ويولي فتي فحال الزبدة:
1- إما نضيف له اثناء الطياب قليل من خميرة الحلويات *مذاقها محايد لايغير إطلاقا طعم الوصفة*.
2- أو ناخدو قليل من الشاي الاخضر نلفه في قطعة ثوب *الحياتي* ونضعه في المرق بين قطع اللحم.
لا تنسوا الردود لان الموضوع تعبني فأريد منكم ردود تواسيني ههههههههه