اليوم عيد...عيد ميلاد فاطمة الزهراء

بسم الله الرحمن الرحيم
السلام عليكم و رحمة الله تعالى و بركاته

يومنا يوم جميل و مناسبتنا مناسبة كبيرة
في مثل هذا اليوم , كان ميلاد أخت فاضلة لنا في الله
دعونا نُدخل البهجة على قلب أختنا اليوم
لن أهنئك
لا ب طورطة
و لا بباقة ورد
لأنك تستأهلين عندنا أكثر من ذالك و الله
أختي الفاضلة فاطمة الزهراء
جرت العادة عندي في مثل هذه المناسبات أن أشتت شمل كل المعازييييم هههههه و لا يهدأ لي بال حتى أرى عراكا ناشبا في الحفلة
لكن من حظك اليوم
قررت أن أنهج نهجا آخر
فلنرى ما الذي ستتمخض عنه هذه التجربة المريرة
ههههه
و لا أظمن عدم الشوشرة على حفلك هذا
هههههههه
للِّي عرض عليَّ يندم
ههههههههه

سولوني على العيد , نخبركم هاد العشية
راه فبابكم ما هو بعيد, من داركم الزكية
سولوني على الفرح , نورِّيكم حروفو الأبجدية
المنقوشة بجمالية وإثقان |, فوق ديك الطنجية
الفايحة منها روايح , الهركمة مرقّْدة فالعطرية
بالمهل على كانون ,حتى طابت هاد العشية

و ماشي على ودها الناس تلمات
نسا و رجال شبان و شابات
ما تلمو غير يباركو ل لالة البنات
فاطيم الزهرا نجمتها علات
هاد النهار الطيور بالليل غردات
العشية هادي و الشمس عاد طلعات
ونورها يبرق فوجه لالة الحادكات

حادكة و نص و ستة ديال الستات
وللي ما تيق يشوف آش وجدات

آش كتبركم يا خوي ؟ وضح دوك الكليمات
باغي ترعف علاش الطنجية ما تحطات ؟
نقول ليك أنا فبلاصة لالة الحادكات
كون عرفتي الصواب ما تنطق بهاد التفاهات
راه الحفلة كبيرة , و ناس كثار فيها تجمعات
سمع يا ولدي راك فدار الكرامات
غير قول لي نفسك واش تشهات
يكون عندك خف من البرق . فلحظات
و كل ما يذكر فمك موجود, من مأكولات
كول وقول ! يرحم والدين من طيبات
فاطيم الزهرا , - إلا باقي ما حفظتيها - لالة الحادكات -

عطيوه , الشوا باش يبدا
و خيروه بين طيحان و كبدة
وخليوه بوحدو , ما تزاحموه على ميدة
و سندو ليه ظهرو بشي مسندة
كول يا خوي و ما تفكر فــ معدة
راه الكامون يداوي و يحيد ليك الغدة

و من الصواب ما نعطيوك الكامون بوحدو
مخلط فكاس د الما باش توردو
راك فدار لْفرح , والكرم عليه نتواعدو
خمسة و خميس على عين للي حسدو

كامونك عندنا مدردر على كفتة مشوية
مخلطة بالتوم و البصل و العطرية
كول حتى تشبع ! و نحطو ليك فقصرية
راك فدار الكرم , دار فاطمة الغرِّية

آرُو يا السربايا داك الحمام
باش نورِّيو لهاذ السيد هاد المقام
و ما تدِّيوْ على كلامو راه ما يتلام
عهدو بالشهيوات سنين و أعوام

و من بعد وجدو ليه رزة القاضي و الملاوي
و كل ما هو نوع منك يا حلاوي
و يْلا تهاوش طلقو ليه بخور الجاوي
و عنداك يحساب ليك هادي ماكلة القهواي

هادي يا سيدي حداكة فاطيم الزهرا
كول و يلا فيك الدغل دغيا تبرا
ماكلة و نسمة كأنك تشم فعنبرة
كوووول ! بلا ما تخاف ما عندو ما يطرا
و ما علينا إلا نقابلوك بالسخرة

أوامر السلطانة هادي
وْكّْلوه حتى يقول باركة أنا غادي
ويدِّي معاه لدارو , الحلاوي و الزبادي
كلام السلطانة أمانة فتقلادي
صافي باركة !!!
باركة ها انت قلتيها
و أمانتك ما تقلدت بيها
و نووووض خلي البلاصة لماليها
هاد الشي ,
وما وصلتي للطنجية للي تسول عليها


شكون قاااااال ؟
شكوووون بغا يجرب الكرم ؟
شكوووون بغا النميمة و التبركيك فالأفراح يحرّم

دار السلطانة هادي حنا فيها
كلنا جينا نباركو ليها
و ندعيو الله يرحم واليدها
على التربية الحسنة للي ما قصرو فيها

ونزيدو ندعيو ربنا يبارك ليها
و يرزقها بشي عريس يتهلا فيها
تكون هي عينيه و هو عينيها
ويرزقها بذرية أمام الله تشفع فيها
على تربية صالحة رباتهم عليها

هذا بمناسبة الميلاد و شوفو الخيرات
حتى لعرسها , و مرحبا بيكم رجال و عيالات

عندك الزهر يا فاطمة ما ناضش ليك الصداع فالحفلة و داك خينا كلاااا و درق زلافتو و بقاو غير الناس لْملااااح ههههه
بارك الله لنا في أختنا الفاضلة فاطمة الزهراء
و سدد خطاك و حقق جميع أماني الخير لديك و جعلك قرة عين والديك
ورزقك من التقوى ما يدخلك به جنة الفردوس ,
آمييييين يا رب العالمين
و السلام عليكم و رحمة الله تعالى و بركاته