للرجال فقط

باسم الله الرحمان الرحيم

للرجال فقط
للي بغى يوصل شي كلام للعيالات و يحرص على باش يقراو كلامو ما
عليه الا يكتب العنوان اعلاه او ممنوع على الجنس اللطيف 


وهاد الجنس اللطيف للي كنسمعو بيه من صغرنا بغينا غير نكتاشفو
انا كوكب كيعيش  عييت ما ندور فعنقي يمين ويسار شفت لقدام
دورت عنقي للور . وليت بحال موكة بقوة التحنزيز عنقي ولا بحال
إلا مركبين ليه لورمة راسي كيدور 360 درجة . وفجميع الاتجاهات
ما بانش لي هاد الجنس اللطيف إلا ف البنيات الصغار ولكن غير
كيكبرو كيتعفرتو وما كيتفكرو انهم جنس لطيف الا فحالة وحدة .
لحظة فعلا صعبة  ، فالوقت للي الراجل ما كيخلي ما يقول
وحتى ما يعمل ولو توصل المسألة للضرب غير باش تسكت مراتو
البيفان دياولها لكن بدون جدوى وما كينقد الموقف الا شي سراق
الزيت الا خرج وقت الصداع . غير كتشوفو المرا كتطير من بلاصتها
وتخبا ورا ظهر راجلها للي كانت محيحا عليه قبل 2 ثواني 


والخطا للي كيدير الراجل هو قتل سراق الزيت . حرام عليك اخاي
الراجل ، قتلتي واحد خرج فلتك من الصداع ، قتلتي  واحد
راجل عليك بكل صراحة انت ما قدرتيش تخلع مراتك وما قدرتيش تزم
ليها فمها خرج هو بلاما  يهضر وبلاما يقرب منها غير مجرد
ما شافتو ركبتها الرجفة .  واش ما سولتيش راسك آش بين
مراتك و بين سراق الزيت و علاش كتخاف منو لهاد الدرجة . واش فات
ليه عطاها شي قتلة واش شي نهار هز عليها موس واش رسل ليها رسالة
تهديد .اسئلة كثيرة كتطرح نفسها وكون سراق الزيت بقى حي كون
جاوبنا عليها . الله يرحمو مات وتدفن السر معاه 


نصيحة للرجال عمركم تقتلو سراق الزيت بالعكس ربيوه وتهلاو فيه
ومتعوه مرة زويتة بلدية مرة اركان مرة زيت الخرواع راه هو
الوحيد للي يقدر يعاونكم  فوقت الصداع


شفتي والله وخا تصاحب بطل العالم فحمل الاثقال ما ينفعك مع لمرا
كيف ما ينفعك سراق الزيت